Архівы Радзівілаў, маёнткі і 50 тысяч звераных загалоўкаў
| Усяго | За тыдзень | |
|---|---|---|
| Спраў у каталогу | 322 910 | +6 782 |
| у вольным доступе | 272 398 | +4 992 |
| у раннім доступе | 50 512 | +1 790 |
Новыя справы тыдня — у раннім доступе: 5 779 з публікацыі архіваў Радзівілаў і яшчэ 1 002 справы НГАБ у Мінску і Гродне. Справы ў раннім доступе бачныя на плане «Даследчык».
Сёння мы адкрылі для ўсіх 4 991 справу НГАБ у Гродне, якія былі ў раннім доступе: 34 вопісы 18 фондаў (ф. 24–98). Астатнія справы ранняга доступу адкрыюцца на працягу наступнага месяца.
Мы працягваем звяраць загалоўкі справаў НГАБ са сканамі вопісаў. За тыдзень звераныя і ўдакладненыя загалоўкі больш за 50 тысяч справаў, а ўсяго іх цяпер 64 868.
Што новага на сайце
Архівы Радзівілаў. Акрамя НГАБ, з'явіліся справы з замежных архіваў, што тычацца тэрыторыі сучаснай Беларусі: 852 з Літоўскага дзяржаўнага гістарычнага архіва, 675 з Галоўнага архіва старажытных актаў у Варшаве і 24 з Цэнтральнага дзяржаўнага гістарычнага архіва Украіны ў Кіеве. Крыніца пазначаная на старонцы кожнай справы.
Маёнткі. У новым раздзеле Маёнткі 3 527 маёнткаў, якія названыя ў загалоўках справаў. Для кожнага паказаныя ўладальнікі (так, як іх называюць справы), вёскі маёнтка і ўсе справы па відах дакументаў.
Пошук па вопісе. На старонцы вопісу можна шукаць па загалоўках, адбіраць справы па гадах, відах дакументаў і статусах і адразу перайсці да справы з патрэбным нумарам. Пошук даруе памылкі ў словах.
Беларускія запыты. Агульны пошук і пошук па вопісе знаходзяць рускія загалоўкі і па беларускім запыце: «Ліда» знойдзе «Лида», «Брэст» — «Брест», «Радзівіл» — «Радзивилл».
Паселішчы. У даведніку паселішчаў цяпер 40 563 месцы: да вёсак з Wikidata далучыліся ўрочышчы і зніклыя вёскі з OpenStreetMap, GeoNames і NGA. На старонцы вёскі паказаная прыналежнасць па гадах паводле друкаваных крыніц: «Список населенных мест Витебской губернии» 1906 года (2 696 вёсак), «Описание церквей и приходов Минской епархии» 1879 года (Навагрудскі павет) і спіс маёнткаў Навагрудскага павета з успамінаў Э. Паўловіча (1887). Таксама там сельсавет і яго фонд у архіве (у ім гаспадарчыя кнігі) і старыя карты. Пошук па паселішчы знаходзіць і метрычныя кнігі царквы або касцёла яго парафіі.
Справы, якія архіў не выдае. 262 справы НГАБ пазначаныя «Не выдаецца» паводле валанцёрскай табліцы адмоў, з прычынай і датай адказу архіва. Калі такая справа ёсць у вашым захаваным пошуку або калекцыі, вы атрымаеце пра гэта ліст.
Тэлеграм. Навіны сайта цяпер выходзяць і ў тэлеграм-канале.